Å laga invitasjonar...

Etter nokre prøverundar før jol og eit par handlerundar innom Panduro, er me i gang med eit viktig ledd i bryllaupsførebuinga: laga invitasjonar!
Det er ein fin ting å laga alle invitasjonane sjølve, frå grunnen av. Me får det slik me ynskjer det, med eit personleg og heimelaga preg. Dessutan er det ein kjekk syssel i mørke januarkveldar.

Ei praktisk og fornuftig arbeidsfordeling openberra seg ganske tidleg i prosessen:

• Ane: dagleg leiar, design og kreativ utforming, innhandlingsansvarleg
• Anders: klippe- og bretteassistent, fotoansvarleg, lyrikk-konsulent

Med denne gode og utfyllande fordelinga har me kome fram til eit originalt og stilreint design med bra innhald, håpar me.

Samtidig har vekslande hell hjå klippe- og bretteassistenten forsterka det personlege uttrykket med sjarmerande småfeil som fjernar ein kvar tvil om sjølvlaga invitasjonar...

Stempel og farga ark av ulik tjukkleik er obligatoriske element i invitasjons-design, i følgje dagleg leiar!

Etter iherdig klipping og bretting er no alle invitasjonane gjennom fase 1: formgjeving, medan ei rekkje er godt inne i fase 2: framsidedesign, takka vere Ane. Forarbeidet er gjort for fase 3: baksidedesign, som såleis vert iverksett fortløpande, og fotoansvarleg er godt inne i prosessen kring fase 4: fotopresentasjon. Dermed er mykje gjort, og fokuset kan rettast mot å runda av invitasjonane med fase 5: invitasjonstekst og informasjon.

Og så er det berre å finna fram adresseliste og konvoluttar. Hmm...har du ordna konvoluttar, Ane?

Bryllaupsinvitasjonane byrjar å ta form